काठमाडौँ, असार २ – संघीय संसद् अन्तर्गत प्रतिनिधि सभाको बैठक आज दिउँसो १ बजे बस्दैछ। नयाँ बानेश्वरस्थित संघीय संसद् भवनमा बस्ने बैठकले लामो समयदेखि चर्चामा रहेको संघीय निजामती सेवा विधेयक, २०८२ माथि छलफल गरी पारित गर्ने तयारी गरेको छ।
बिज्ञापन
बिज्ञापन
आजको कार्यसूचीअनुसार संघीय मामिला तथा सामान्य प्रशासनमन्त्री राजकुमार गुप्ताले ‘राज्य व्यवस्था तथा सुशासन समितिको प्रतिवेदनसहित संघीय निजामती सेवा विधेयक, २०८२ माथि छलफल गरियोस्’ भन्ने प्रस्ताव संसद्मा प्रस्तुत गर्नेछन्। सो विधेयकलाई छलफलपछि पारित गर्ने कार्यक्रम तय गरिएको छ।
बिज्ञापन
यस विधेयकमार्फत संघीय संरचनाअनुसार निजामती सेवा प्रणालीलाई एकरूपता दिने, सेवाको पुनः संरचना गर्ने र कर्मचारी व्यवस्थापनमा स्पष्टता ल्याउने लक्ष्य लिइएको छ। विधेयक पारित भएमा, संघीय निजामती संरचना कार्यान्वयनतर्फ निर्णायक पाइला अघि बढ्ने विश्वास लिइएको छ।
त्यस्तै, बैठकमा राज्य व्यवस्था तथा सुशासन समितिका सभापति रामहरि खतिवडाले ‘नेपाल नागरिकता (दोस्रो संशोधन) विधेयकसम्बन्धी समितिको प्रतिवेदन, २०८२’ पनि संसद्मा पेस गर्ने कार्यक्रम छ।
दुवै विधेयकको संवेदनशीलता र राजनीतिक महत्वका कारण आजको संसद् बैठकमा गम्भीर बहस र दृष्टिगोचर निर्णय हुने अपेक्षा गरिएकोछ।
